Dibistana Şemiyê ya Yekmalê bernameyeke zimanî ya dawiyê heftê ye ku piştgiriya zarokên piçûk û xwendekarên diçin dibistanê dike ji bo hînbûn û pêşvebirina zimanê kurdî. Ev bername li Berlînê bi hevkariya Akademiya Yekmalê û Navenda Malbatan a Yekmalê (Rengîn) pêk tê û dixwaze bi riya çalakiyên cur bi cur ziman û çanda kurdî hînî zarokên kurdbike. Çalakiyên me ji dersên ziman, kargehên huner, kargehên dans û herweha dersên werzişê pêk tên. Projeya Dibistana Şemiyê xwedî rêbazeke giştî ya hînbûna ziman e ku hînkirina ziman bi çalakiyên çandî û hûnerî ve girê dide, bi vê awayî alîkariya zarokan dike hem ji bo pêşvebirina ziman, hem jî ji bo feraseteke kûr a çanda kurdî.
Dibistana Şemiyê herweha dibe alternatîvek ji bo zarokên ku nikarin beşdarî dersên kurdî di dibistanan de bibin.
Bernameya projeyê bi taybetî ji bo sê komên zarokan e:
1) Zarokên Pêşdibistanê (4-5 salî): Zanîna kurdî hewce nake.
2) Xwendekarên Destpêkê yên Dibistanê (6-7 salî): Zanîneke destpêkê ya kurdî dê baş be, lê ne ferz e.
3) Xwendekarên Navîn (8-10 salî): Zanîneke destpêkê ya kurdî dê baş be, lê ne ferz e.